Poslovne vesti - Makedonija

Од Скопје се лета директно кон 26 дестинации

Годинава македонските граѓани ќе можат директно од Скопје да летаат кон 26 дестинации во Европа и Азија. Од 2009 година бројот на директни авиоповрзувања со аеродромот „Александар Велики“ во Скопје пораснал за седум нови градови. Годинава од април од Скопје ќе се патува директно и до Париз, Брисел, Келн и Франкфурт со авиопревозникот „Визер“, а од мај и секојдневно до Рим, преку „Ал Италија“.

Истанбул, Виена, Цирих, Лондон и Малме се петте топ-дестинации каде што минатата година најмногу патувале македонските граѓани, информираат од скопскиот аеродром „Александар Велики“.

Најголем број патници се превезуваат со „Визер“, потоа следуваат „Туркиш ерлајнс“, „Аустријан ерлајнс“ и „Пегасус“. Зголемен е и бројот на патници, кој лани изнесувал 984.407 на аеродромот во Скопје и 83.000, кои патувале преку аеродромот „Св. апостол Павле“ во Охрид.

„Минатата година на двата аеродроми имало зголемување кај бројот на патници за 20 проценти, а од 2010 година бројот на патници е зголемен за 44 проценти. Во последните три години бележиме просечен раст од 10 проценти, а највисокиот просечен раст во Европа е пет отсто“, истакна Алпер Ерсој, директор за оперативни работи во ТАВ Македонија.

Добрите параметри од работењето на аеродромот се причина што „Александар Велики“ втора година по ред е прогласен за најдобар аеродром во Европа во категорија до 2 милиони патници, од страна на Меѓународниот совет на аеродроми.

Според генералниот директор Зоран Крстевски, наградата се должи на воведувањето нови дестинации минатата година, како Стокхолм, Гатенбург и Берлин, како и политиките за субвенционирање на авиокомпаниите.

„Минатата година е успешна не само по бројот на патниците, туку и по безбедноста и сигурноста во авиосообраќајот“, рече Крстевски.